Samirə Ərəblinskaya (Müəllif)
Ötən günlərdə, “CAN” diaspor təşkilatının sədri Şervin Nəcəfpurun təşəbbüsü ilə Azərbaycan əsilli norveçli məşhur, Marie Sabhanın yeni mahnısı beynəlxalq ictimaiyyətin diqqətinə təqdim edilib.
OLAY yazır ki, anası norveçli, atası isə Cənubi Azərbaycandan olan Marie Sabha Azərbaycan haqqında daha bir mahnısının təqdimatını edib. Marie Sabha Norveçin Tronheym şəhərində doğulub, boya-başa çatsa da, öz yaradıcılığında hər zaman Azərbaycan mədəniyyətini, irsini, ənənələrini müasir elektron musiqi ilə üzvi şəkildə birləşdirərək beynəlxalq arenaya, dinləyicilərinə təqdim edir.
Norveç doğumlu, əslən cənubi azərbaycanlı, qadın geyimi brendinin yaradıcısı, modelyer-dizayner, “CAN” diaspor təşkilatının sədri Şervin Nəcəfpurun (Shervın Najafpour) şəxsi təşəbbüsü ilə Marie Sabha və məşhur azərbaycanlı Dj və produser Heydərin birgə bəstələdiyi valehedici "A Billion Years Too Soon" (Heyder Remix) adlı növbəti mahnısı dünya trendinə düşmüş, dinləyicilərin ən sevimli xitinə çevrilmişdir.
Qeyd edək ki, Marie Sahba 2019-cu ildə "Take Me Back" adlı debüt sinqlını buraxdıqdan sonra Norveçin ən perspektivli sənətçilərindən biri kimi sürətlə yüksəldi. Onun musiqisi H&M-in beynəlxalq pleylistlərində və Netflix-in "Witch Hunt" kimi əsas teleseriallarında yer alıb. Onun "Azery Baby" adlı EP və sonrakı debüt albomu böyük marağa səbəb olub.
Albomun "Over & Over" və "Give Me A Sign" kimi sinqlları Norveçin milli radiosunda geniş yayımlandı və Dagsavisen və Aftenposten kimi böyük nəşrlərdən tənqidi rəğbət qazandı. Marie türk tamaşaçıları ilə də dərin əlaqə qurub, nüfuzlu məkanlarda çıxış edib və “Akşam” kimi aparıcı media qurumlarından təriflər alıb.
Yenilikçi EDM remiksləri ilə tanınan məhsuldar azərbaycanlı musiqi prodüseri Heyder, Marienin işinə təzə və canlı enerji gətirir. Klassik fortepianodakı keçmişi və 2014-cü ildən EDM-ə olan həvəsi ilə Heyder, Dash Berlin və Zedd kimi mühüm sənətçilər üçün remikslər yaratmışdır, hazırda isə onun orijinal trekləri Avropada rezonans yaratmağa davam edir.
