Günlər qısalır, səhərlər isə sərinləşir: şübhə yoxdur, payız artıq gəlib.

OLAY yazır ki, bu yuva qurma mövsümünün başlaması eyni zamanda başqa bir dövrün – “cuffing season”, yəni “münasibət mövsümünün” də başlanğıcı deməkdir.

ABŞ-də yaranan bu termin, TikTok-da minlərlə paylaşımda göründüyü kimi artıq dünya üzrə 20-35 yaş arası bir çox insanın sevgi lüğətinə daxil olub.

“Cuffing season” nədir? 

Sadə desək, havalar soyuduqca insanlar bir partnyora daha çox bağlanmağa meylli olurlar. Hətta bəzi subaylar bu dövrdə bahara qədər davam edəcək müvəqqəti münasibət axtarışına çıxırlar. Qısacası, soyuq aylarda istilik və yaxınlıq ehtiyacı artır.

Tarixi və təkamül səbəbləri 

Cənubi Uels Universitetindən münasibət psixologiyası üzrə mütəxəssis Dr. Martin Qraff izah edir ki, “cuffing” – birinə müəyyən müddətlik bağlanmaq istəyini simvolizə edən metaforadır. Bu davranış adətən oktyabr ayında başlayır və Sevgililər Günü ərəfəsində sona çatır.

Qraff deyir ki, bu, təkamül tariximizə əsaslanır: “Keçmişdə qış ayları həm soyuq, həm də təhlükəli olurdu. İnsanlar sağ qalmaq və təhlükədən qorunmaq üçün birlikdə olmağa məcbur idilər. Tək qalmaq riskli idi, birlikdə olmaq isə həm istilik, həm də qorunma təmin edirdi”.

Müasir dövrdə psixoloji səbəblər

Psixoloq Susan Albers isə bu davranışın müasir səbəblərinə toxunur: “Qaranlıq və soyuq gecələr insanlarda tənha və ruhdan düşmüş hisslər oyada bilər. Serotonin səviyyəsinin düşməsi də əlavə təsir göstərir. Bu, mövsümi əhval pozuntusu ilə əlaqəli ola bilər”.

Tibbi olaraq “mövsümi depressiya” adlanan bu hal, üzüntü və yorğunluqla müşahidə olunan və il boyu müəyyən fəsildə baş verən depressiv vəziyyətdir. Albers deyir ki, bu duyğular emosional dəstək – istər dost, istər sevgili, istərsə də ailə üzvü ilə – paylaşılaraq yüngülləşdirilə bilər.

Lakin o da xəbərdarlıq edir ki, yalnızlıq qorxusu ilə münasibətə girmək uzunmüddətli həll deyil:

 “Sadəcə içimizdəki boşluğu doldurmaq üçün biri ilə münasibətə başlasaq, gözləntilərimizi azaldar və bizə uyğun olmayan bir əlaqəyə daxil ola bilərik”.

Nəticə:  “Cuffing season” (Münasibət mövsümü)  təbiətdən gələn istilik və yaxınlıq ehtiyacının müasir əksidir. Amma emosional münasibətlər fəsillik olmamalıdır — onlar dəyərli və davamlı olmalıdır.