“Kurtlar Vadisi”nin ssenaristləri Raci Şaşmaz, Bahadır Özdener və Cüneyt Aysan keçmiş MİT əməkdaşı Kaşif Kozinoğlunun 2011-ci ildə həbsxanada ölümü ilə bağlı yenidən başladılan istintaq çərçivəsində Silivri Baş Prokurorluğunda ifadə veriblər.

OLAY yazır ki, serialın ssenaristlərindən Raci Şaşmazın ifadəsində bunlar yer alıb:

“Qanuni və ya qeyri-qanuni heç bir güc və ya cinayətkar qrupla əlaqəmiz yoxdur və olmayıb. “Kurtlar Vadisi” cəmiyyətin fotosunu çəkir və açıq mənbələrdən istifadə edərək bunları dram gücü ilə tamaşaçının anlaya biləcəyi formata gətirib ictimaiyyətə təqdim edir. Bu fenomen serialı gözdən salmaq üçün iki məsələ önə çıxarıldı. Bunlardan biri zorakılıq, digəri isə “bunlar kimdənsə sənəd və məlumat alırlarmı?” məsələsi idi. Zorakılıq kampaniyası serialı nüfuzdan salmaq, ailələri qorxudaraq ekran qarşısından uzaqlaşdırmaq məqsədilə aparıldığı halda, məlumat və sənəd aldıqları iddiası serialın uğuruna kölgə salmaq üçün qabardıldı.

Kiminsə ölümünü əvvəlcədən bilməyimiz mümkün deyil. Bundan əlavə, sosial mediada FETÖ-çü Ali Fuat Yılmazerin ssenariyə müdaxilə etdiyi barədə iddialar tamamilə böhtandır. Mən Ali Fuat Yılmazeri tanımıram və onunla heç bir əlaqəm olmayıb. Ərdoğan və ailəsi ilə bağlı məzar daşı vasitəsilə mesaj vermək nə bizim inandığımız dəyərlərə uyğundur, nə də belə bir şey olub.

Üstəlik, bu, ssenari olaraq mənim müəyyən etdiyim və nəzarət edə biləcəyim bir məsələ deyil. Aradan çox vaxt keçib. O vaxt qəbiristanlıq çəkilişlərində həqiqi məzar daşlarını örtmək kimi bir qayda yox idi. Bu, həqiqi məzar daşı da ola bilər, prodakşn və sənət qrupunun hazırladığı, geniş yayılmış soyadlardan ibarət saxta məzar daşı da ola bilər. Xatırlamağım mümkün deyil.

Həmçinin həmin dövrün şərtlərində kirayə avtomobillərdən istifadə olunurdu və o vaxt nömrə nişanlarını dəyişdirmək adəti yox idi. “34 PLT 34” nömrəli avtomobildən başqa digər avtomobillərin nömrələrini ssenaristlərin bilməsi mümkün deyildi.

Osman Sınav Hasan Atilla Uğurla ilk dəfə “Deli Yürek: Bumerang Cəhənnəmi” filminin çəkilişləri zamanı tanış olub. Diyarbekirdə polisin nəzarətində olan ərazidə aparılan çəkilişlər zamanı polisdən icazə almağımız lazım idi. Osman Sınav Hasan Atilla Uğurla bu vasitə ilə tanış olub. Osman Sınav ilə Hasan Atilla Uğur arasındakı dostluq daha da inkişaf edib. Onlar tez-tez görüşürdülər. Bu vasitə ilə mən də Hasan Atilla Uğurla tanış oldum, lakin heç vaxt onunla şəxsi münasibətim olmayıb. Bizim ssenarimizə heç kimin müdaxiləsi olmayıb. Osman Sınav zaman-zaman ssenari ilə bağlı fikir və məsləhətlər vermək istəyirdi, lakin bunun düzgün olmadığını düşündüyüm üçün buna icazə vermədim. Bu tələbini qəbul etmədiyim üçün yanıma gəlib təhdidlər aldığını, uşaqlarının olduğunu və bu işi buraxaraq mənə təhvil vermək istədiyini söylədi. Serialdan ayrılması da bu şəkildə baş verdi.

“Kurtlar Vadisi”nin və ya “Pana Film”in “YouTube” hesabı ilə heç bir əlaqəm yoxdur. Sosial mediada “YouTube” hesabında edilən dəyişikliklə bağlı yayılan xəbərlər böyük ehtimalla saxta hesablar tərəfindən paylaşılıb. Bunun bizimlə heç bir əlaqəsi yoxdur. Üstəlik, “Kurtlar Vadisi Gladio” və “Kurtlar Vadisi Filistin” filmləri ilə “FETÖ”çü təşkilatlanmanın çox narahat olduğu iki film çəkilib və dövlətin bu zərərli struktura qarşı mübarizəsinə açıq şəkildə dəstək verilib.

Mən şəxsən 15 iyul gecəsi Çengelköydə “FETÖ”çü terrorçularla toqquşmuş, Silivridəki məhkəmə proseslərinə müdaxilçi kimi qatılmış, təqsirləndirilən Mürsel Çıkrıkçını və digər “FETÖ” mənsubu terrorçuları tanımış biriyəm.

Bu “FETÖ”çü terrorçularla birlikdə anılmağı özüm üçün təhqir hesab edərəm.