Heydər Əliyev Fondunun icraçı direktoru Anar Ələkbərov Vətən müharibəsinə həsr olunan 44 filmi ilə bağlı paylaşım edib.
OLAY yazır ki, bu barədə A. Ələkbərov rəsmi instaqram səhifəsində fotolar paylaşıb və bildirib ki, ekran işinin çəkilişləri başa çatıb:
“4 il ərzində böyük zəhmətlə üzərində çalışdığımız “44” bədii filminin çəkilişləri bu gün uğurla başa çatdı. Qarşıdakı post-prodakşn mərhələsində bizi hələ ciddi və məsuliyyətli işlər gözləyir. Filmin ərsəyə gəlməsində əməyi olan fədakar komanda üzvlərimə, peşəkar aktyorlara və bu işə ürəkdən yanaşan hər kəsə dərin təşəkkürümü bildirirəm. Bu cür istedadlı heyətlə çalışmaq həm böyük zövq, həm də dəyərli bir təcrübə oldu. Allah şəhidlərimizə rəhmət eləsin. Ali Baş Komandanımıza və qəhrəman igidlərimizə bizə yaşatdıqları tarixi Zəfərə görə daim minnətdarıq!”.
Qeyd edək ki, “44” Bakı Media Mərkəzinin layihəsidir. Filmin yaradıcı heyətinə İbrahim Çingiz, Azər Atakişiyev, Elnur Nəcəfli, Əli Tərlan, İlqar Musayev, İsmayıl Kərimov, Mehriban Zəki, Nadir Rüstəmli, Türkay Cəfərli və Özge Gürel kimi simalar daxildir.
Çəkilişlər Bakı şəhəri ilə yanaşı, Ağdam, Cəbrayıl, Füzuli, Gəncə, Hadrut, Xankəndi, Xocavənd, Şuşa və digər bölgələrdə aparılıb.
