Dövlət ittiham tərəfi reper Endi Kartraytın həyat yoldaşı Marina Koxalla bağlı cinayət işi üzrə məhkəmə çıxışlarını başa çatdırıb. Bu barədə Sankt-Peterburq Prokurorluğunun Telegram kanalında məlumat verilib.
OLAY yazır ki, qadın adam öldürməkdə və meyit üzərində təhqiredici hərəkətlər etməkdə ittiham olunur. Prokurorun versiyasına görə, 2020-ci il iyulun 24-də Marina Koxal, Nevski prospektindəki 134 nömrəli binanın mənzillərindən birində, həyat yoldaşına öldürmək məqsədilə iynə ilə dərman yeridib. Prokurorluğun məlumatına əsasən, bundan sonra qurban şok vəziyyətinə düşüb və kəskin oksigen çatışmazlığı yaranıb. Nəticədə kişi hadisə yerində ölüb.
İstintaqın müəyyən etdiyinə görə, cinayəti gizlətmək üçün Koxal mişar və bıçaqdan istifadə edib. O, Kartraytın cəsədini hissələrə ayırıb, bəzi daxili orqanları məhv edib, digər hissələri isə soyuq, rütubətli mühitə və duza məruz qoyub.
Məhkəmə çıxışında dövlət ittihamçısı — Sankt-Peterburq Prokurorluğunun Cinayət-Məhkəmə İdarəsinin baş prokuroru Aleksey Poltorak məhkəmədən Koxalın təqsirli bilinməsini və ona 13 il ümumi rejimli islah koloniyasında azadlıqdan məhrumetmə cəzası verilməsini istəyib.
Xatırladaq ki, 2020-ci ilin iyulunda Endi Kartraytın qalıqları ər-arvadın mənzilində, buzdolabında paketlərə yığılmış vəziyyətdə tapılmışdı. Bəzi daxili orqanların paltaryuyan maşında yuyulduğu da müəyyən edilmişdi. Marina Koxal baş verənləri etiraf etmiş, lakin bildirib ki, guya ərinin utancverici narkotikdən həddən artıq dozada ölməsinin izlərini gizlətmək istəyib. Lakin məhkəmə-tibbi ekspertiza reperin qanında qadağan olunmuş maddələr tapmayıb.
2021-ci ilin oktyabrında Marina Koxal ev dustaqlığına yerləşdirilib və hal-hazırda da bu cinayət işi üzrə ittiham olunan şəxs sayılır.
2024-cü ilin avqustunda isə Endi Kartraytın dul arvadının qətimkan tədbiri yumşaldılıb — ev dustaqlığı müəyyən hərəkətlərin qadağan olunması ilə əvəz edilib.
