Reper və musiqi prodüseri Pi Diddinin (əsl adı — Şon Kombs) həbs müddəti artırılıb.
OLAY yazır ki, bu barədə "Page Six" məlumat yayıb.
Nəşrin məlumatına görə, Pi həbsxanadan əvvəlcədən planlaşdırıldığından bir ay gec çıxacaq. Onun 8 may 2028-ci ildə azadlığa buraxılması nəzərdə tutulurdu. İndi isə bu tarix 4 iyun 2028-ə dəyişdirilib. Vaxtın uzadılmasının səbəbi açıqlanmır.
"Page Six" qeyd edir ki, həbs müddətinin artırılması, reperin həbsxanada bir neçə qaydanı pozması ilə bağlı yayılan şayiələr fonunda baş verib. Bildirilir ki, Şon Kombsun həbsdə özünə məxsus hazırlanmış spirtli içkidən istifadə etməsi səbəbindən problemlər yaşadığı iddia olunurdu.
Xatırladaq ki, oktyabrın əvvəlində Nyu-York məhkəməsi reperi insanların fahişəliyə cəlb olunması ittihamı ilə 50 ay həbs cəzasına məhkum etmişdi. Məhkəmə heyəti onu iki epizod üzrə günahkar bilmiş, lakin reket və seksual istismar məqsədilə zorla köçürmə ittihamları üzrə bəraət vermişdi.
CBS News-un 11 noyabr məlumatına əsasən, Pi hazırda Fort-Diks həbsxanasında ibadət otağında çalışır və narkomaniya ilə mübarizə üzrə reabilitasiya proqramında iştirak edir. Keçmiş həbsxana komissarı bildirib ki, reperin vəzifələrinə aşağıdakılar daxildir:
kilsə kitabxanasına xidmət etmək,
kahinin kabinetini təmizləmək,
qeydiyyat və yazıları aparmaq.
Reperin həbsxana davranışı və proqramdakı fəaliyyəti gələcəkdə onun şərti azadlığa çıxma şansına təsir edə bilər.
