Samirə Ərəblinskaya (Müəllif)Xəbər verdiyimiz kimi, prodüser Tarix Əliyev (Tolik) Türkiyədəki “Best model” yarışması ilə bağlı qalmaqallara münasibət bildirib və Azərbaycandan gedən modellərin Erkan Özermanın əxlaqsız təkliflərini qəbul etdiyini iddia edib.
Yarışmanın beynəlxalq təşkilatçısı Pərviz Əzimzadə OLAY-a açıqlamasında prodüserin ittihamlarını təkzib edib:
“Onlarla əməkdaşlıq etdiyimiz müddətdə bu söhbətlərlə rastlaşmamışıq. Erkan Özerman Türkiyə şou-biznesini quran adamdır. Məsələn, bir çox tanınmış aktyor bu yarışmadan çıxıb. Sözügedən məsələlər doğrudur, ya yox deyə bilmərəm. Lakin Biz Türkiyədə olanda yalnız hörmət görmüşük. Bunlar Tolikin şəxsi fikirləridir”.
“Best Model of the World 2007” birincisi Rüstəm Cəbrayılov da məsələdən xəbərdar olmadığını söyləyib:
“Birinci olduğum yarışmada 100-dən çox ölkə iştirak edirdi. Qətiyyən belə bir hal yaşanmayıb. Həmin söhbətlər yarışmanın adına xələl gətirə bilər. Erkan Özermanın da xeyli yaşı var. Bəlkə də son zamanlar ağlını itirib. Kim nə deyir, özü bilər. Amma mən sözügedən hallarla rastlaşmamışam”.
“Best Model of the World 2010” yarışmasında ikinci olan Günay Musayeva isə bununla bağlı belə açıqlama verib:
“Deyilənlər oğlan iştirakçılarla bağlıdır. Bunun mənə aiddiyyəti yoxdur. Deyək ki, Türkiyə və Azərbaycanda belə bir hadisə baş verib. Amma dünya yarışmasında belə bir şey ola bilməzdi. Mən də dünyada ikinci seçilmişəm”.
Qeyd edək ki, müsabiqənin builki kişi iştirakçıları E.Özermanın onlara əxlaqsız təklif qarşılığında birincilik vəd etdiyini söyləyiblər.
