Dilşad Bəhruzqızı (Müəllif)
Başqalarının diqqəti, emosional empatiya və dostlarınızın dəstəyi olmadan, heç kim tərəfindən tanınmadan bir həyat yaşamaq fikri necə səslənir?
Bəli, cavabınızı təxmin edərək deyə bilərik ki, oxşar qorxulu həyat ssenariləri istər-istəməz ağlımıza gəlir, xüsusən də həyatın çətin anlarında.
Açıq deyək, qorxu hamımızda olan bir hissdir. Həyat təcrübələrindən və şüuraltından asılı olaraq demək olar ki, hər kəs müxtəlif şeylərdən qorxur. Ancaq təklik qorxusu əksər insanlara təsir edir. Üstəlik, tənhalığın əslində nə olduğunun dəqiq tərifini tapa bilmədiyimizi də qeyd edə bilərik.
Bəs tənhalıq qorxmalı olduğumuz bir şeydir?
OLAY tənhalıqdan qorxan insanların diqqət etməli olduğu məqamları təqdim edir:
“Fikirlərimlə mübarizə aparmaqdan yoruldum”.
Müasir həyatın gərgin ritminin bizi bir müddət tək qalmağa və özümüzlə vaxt keçirməyə məcbur etdiyini desək, yalan olmaz. Kim şəhərin xaosundan, səs-küyündən darıxıb özü ilə vaxt keçirmək istəməz ki? Məhz bu nöqtədə yeni bir problemlə qarşılaşırıq: Keçmiş illərdən bu günə qədər yaşadığımız hadisələrin çoxu haqqında sonsuz düşünmək… Bəli, bu fikirləri bir müddət kənara atıb özümüzə fokuslana bilərik, amma zaman keçdikcə fikirlərin əsiri altında yaşamaq heç də təəccüblü deyil. Diqqətimizi bu daxili düşüncələrdən yayındırmaq üçün daima xarici stimullara ehtiyacımız var.
Tək olanda nə düşünürsünüz? Uzun müddətdir mesaj yazmaq üçün gözlədiyiniz keçmiş sevgilinizi, iş dəyişikliyi üçün müraciət etdiyiniz yeni vəzifəni və ya son günlərdə dostlarınızla yaşadığınız kiçik çəkişmələri? Ağlınıza gələ biləcək müxtəlif ssenarilərə baxmayaraq, düşüncələrinizlə baş-başa qalmaq baxımından bir nöqtədə tək qalmaq çox əhəmiyyətlidir.
“Düşünürəm ki, həmişə belə olacaq”.
Yalnızlığın ömürlük bir hal olduğunu düşünmək düzgün olmaz. Bu yaxınlarda sevdiyiniz biri ilə ayrılmaq məcburiyyətində qalmısınızsa, narahat olmamalı və sonsuza qədər tək qalmaqdan qorxaraq yeni bir əlaqə axtarmağa çalışmamalısınız. Müəyyən bir müddət tək qalmaq, özünüzlə əlaqənizi gücləndirmək üçün əla fürsətdir. Məşğul olduğunuz zaman yeni bir dil öyrənməyə, maraqlı səyahətə çıxmağa və ya kitab oxumağa vaxtınız yox idi. Bu prosesdə özünüzü yeniləməyi və gücləndirməyi unutmayın, yeni münasibətə tələsməyin, hər şeyin öz vaxtı var!
“Mən hər zaman insanlarla olmaq məcburiyyətindəyəm”.
Əgər insanlarla münasibətləri əhvalınızdakı qəfil dəyişikliklər üçün “dərdə çarə” kimi qəbul edirsinizsə, bu, əlaqələrinizin gündən-günə daha çox yorğunluğa çevrilməsinə səbəb olacaq. Özünüzü həqiqətən hiss etdiyinizdən tamamilə fərqli davranmaqdansa, təcrid dövründə təbii olmağa icazə verin. Özünüzlə tək qalanda başqa insanlara qarşı süni maraq yox olur. Başqasının tərifi və ya tənqidi sizin üzərinizdə heç bir əhəmiyyət kəsb etmirsə, narahat olmağın və inciməyin mənası yoxdur. Belə hallarda təkliyə azadlıq kimi baxmağı tövsiyə edirik. Tənhalıq faciə deyil, bu, əvvəllər keçdiyiniz yol haqqında düşünmək, hiss etdiyiniz lazımsız yükdən azad olmaq və ruh sağlamlığınızı yaxşılaşdırmaq üçün bir səbəbdir.
