Rəşad Əliyev (Müəllif)
Ötən axşam “Apple” şirkəti öz yeni nəsli “iPhone 16” smartfonunu təqdim edib.
OLAY yazır ki, qadjet yeni və daha sürətli “A18” prosessoru ilə təchiz edilib.
İstehsalçı onun əvvəlki nəsil smartfonların prosessorundan 30% daha sürətli olduğunu iddia edib.
Telefonlara foto və videoların daha asan və sürətli çəkilməsi üçün kamera idarəetmə düyməsini əlavə edib.
“İphone 16” arxasındakı iki kamera yerini dəyişərək şaquli vəziyyətdə arxasına yerləşdirilib.
Yeni nəsil “iPhone 16” “Apple Intelligence” ilə təchiz olunacaq.
Bu, mətnləri onlayn tərcümə edə, həmsöhbətin statusundan asılı olaraq optimal ünsiyyət üslublarını seçə, həmçinin əlyazma mətn əsasında “emoji” yarada bilən süni intellekt platformasıdır. Bu funksionallıq 2024-cü ilin oktyabrında əlçatan olacaq və hələlik yalnız ingilis dilində mövcuddur.
Yeni smartfonun ekran ölçüsü “iPhone 16” versiyasında 6,1 düym, “iPhone 16 Plus” versiyasında isə 6,7 düym təşkil edir. Qadcetlər beş rəngdə - qara, ağ, çəhrayı, yaşıl və mavi rənglərdə olacaq. 128 GB əsas yaddaşa malik “iPhone 16” versiyası 799 dollara, “iPhone 16 Plus” isə 899 dollara satışa çıxarılacaq.
“iPhone 16 Pro” və “Pro Max”ın flaqman versiyaları sələfləri ilə müqayisədə daha böyük displeylər alıb. Beləki onların diaqonalı 0,2 düym artaraq müvafiq olaraq 6,3 və 6,9 düym olub.
Smartfonlar “A18 Pro” prosessorları ilə təchiz edilib. Həmçinin smartfonun əsas yenilikləri arasında yeni 48 meqapiksellik ultra geniş bucaqlı kamera da var.
“iPhone 16 Pro” və “iPhone 16 Pro Max” qiymətləri sələfləri ilə eyni qalıb: müvafiq olaraq 999 və 1199 dollardan.
Sözügedən yeni nəsil smartfonların satışları rəsmi olaraq sentyabrın 20-də başlayacaq.
