Pərviz Hüseyn (Müəllif)
“Nova Gorica” kino mərkəzində “Qıfıl” adlı tammetrajlı bədii filmin hazırlıqları başlayıb.
OLAY yazır ki, bu barədə AKİ məlumat yayıb.
Komik melodram janrında olacaq filmin çəkilişlərinə iyulda başlanılması planlaşdırılır. Filmin mövzusuna əsasən Zeli (Zeynalabdin) kəndlərindən bir qız sevir. Lakin qıza başqa biri elçi düşür. Zeli də falşıya müraciət edərək toyun baş tutmasına mane olmaq istəyir. Falçı ona bir qıfıl verir ki, sevdiyi qızın valideynlərinin ağzı bağlansın. Qıfılı hasardan həyətə atanda isə təsadüfən nənənin sinəsinə dəyir. Nənənin ölməsindən qorxan ailə toyu tezləşdirir. Arzusu ürəyində qalan Zeli bu hadisədən sonra kor-peşman Bakıya gedir. O, kəndə bir də xəzəl düşəndən sonra qayıdır. Bəlkə qızı görər deyə, yolunu onların qapısının ağzından salır. Əlbəttə, Zeli artıq ər evində olan qızı görmür. Birdən gözlərindən iki damla yaş gilələnir və ürəyində falçı Aminəni söyür.
Filmin ssenari müəllifi və quruluşçu rejissoru Tahir Tahiroviç, quruluşçu operatoru Rafiq Əliyev, bəstəkarı Lalə Əhmədova, kreativ prodüseri İradə Bağırzadə, baş prodüseri Vidadi Rüstəmovdur.
Layihə Mədəniyyət nazirliyinin “Tammetrajlı bədii film layihələrinə dəstək-2022” müsabiqəsinin qalibləri sırasında olub və hazırda filmin kastinq prosesi gedir.
