Şahanə Paşa (Müəllif)
29-31 iyulda Mədəniyyət Nazirliyi və digər dövlət və özəl qurumlar tərəfindən Gəncə şəhərinin Hacıkənd qəsəbəsində keçirilən II Milli Yaylaq Festivalında iştirak edən media nümayəndələri narazılıq edib.
OLAY yazır ki, həmkarlarımızın sosial şəbəkələrdə səsləndirdiyi fikirlərə görə, hava şəraiti anidən dəyişib, yağış yağmağa başlayıb və nəqliyyat vasitələrinin hərəkətində çətinlik yaranıb.
İddialara görə, qalmaq üçün yerin təşkili də problemli olub. Belə ki, jurnalistlərin yerləşdirilməsi üçün hotel yox, hostel tutulub. Bu da bir çox həmkarımızın narazılığına səbəb olub. Onlardan bir çoxu yaxınlıqda qalan qohumlarının yanında, bir hissəsi isə maşında gecələyib. Həmçinin qeyd edilib ki, yemək və digər ehtiyaclar üçün də normal şərait yaradılmayıb.
Nazirlikdən OLAY-a bildirilib ki, səfərdən dönüş zamanı saat 20 radələrində media nümayəndələrini daşıyan avtobus festival ərazisindən yola düşmüşdür:
“Təxminən 700 metr məsafə qət olunduqdan sonra güclü yağış yağmağa başlamış, torpaq yolda yaranmış palçıq nəqliyyat vasitəsinin hərəkətində çətinlik yaratmışdır.
Ərazidə xidmət aparan DİN-in əməkdaşları tərəfindən iritutumlu nəqliyyat vasitələrinin hərəkəti məhdudlaşdırılmışdır.
Avtobusda olan media nümayəndələrinin bir qrupu səfərə məsul olan Mədəniyyət Nazirliyinin əməkdaşı və polis əməkdaşlarının təkidlərinə baxmayaraq, nəqliyyat vasitəsini tərk edərək piyada yollarına davam etmişlər.
Nazirliyin Gəncə Regional Mədəniyyət İdarəsinin rəisi Vasif Cənnətov həmin şəxslərin şəxsi avtomobili ilə qarşılanıb müvafiq qaydada yerləşdirilməsini təmin etmişdir.
Avtobusda qalan digər nümayəndələr isə nazirliyin rəsmi şəxslərinin aidiyyəti dövlət orqanları ilə danışıqlarından sonra səhər saatlarında ərazidən təhlükəsiz yerə köçürülmüşdür.
Gəncə Şəhər İcra Hakimiyyətinin başçısı Niyazi Bayramovun şəxsən iştirakı ilə DYP-nin əməkdaşları tərəfindən yüksək manevr imkanlarına malik nəqliyyat vasitəsilə media mənsubları beş-beş Hacıkənd qəsəbəsinə evakuasiya edilmişdir.
Qəsəbədə media nümayəndələrinə Niyazi Bayramov və Gəncə RMİ-nin rəisi Vasif Cənnətov tərəfindən yüksək diqqət göstərilmiş, mikroavtobusla Bakı şəhərinə yola salınmışdır.
Mədəniyyət Nazirliyi kəskin hava və çətin relyef şəraiti ilə əlaqədar yaranmış xoşagəlməz vəziyyətə görə media nümayəndələrindən və qonaqlardan qaşılaşdıqları duruma görə təəssüf hissi keçirir və narahatlığa görə üzr istəyir”.
