Pərviz Hüseyn (Müəllif)
Xalq artisti Miri Yusif onun haqda kütləvi informasiya vasitələri və sosial şəbəkələrdə ittihamlar səsləndirən və çıxışlarında təhqirə yol verdiyi iddia etdiyi müğənni Sevinc Musayevanı məhkəməyə verib.
OLAY-ın əldə etdiyi məlumata görə, Bakı şəhər Binəqədi rayon məhkəməsində Musayeva Sevinc Aydın qızına qarşı cinayət məcəlləsinin 144-148-ci maddələrində yer alan şəxsin azadlığı və ləyaqəti əleyhinə olan cinayətlər bölməsi əsas götürülüb.
Belə ki, hakim Vüsal Tağıyevin sədrliyi ilə keçən iclasda S.Musayeva 147.1 - Böhtan, yəni yalan olduğunu bilə-bilə hər hansı şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında yayma, 148 - Təhqir, yəni kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında şəxsiyyətin şərəf və ləyaqətini nalayiq formada qəsdən alçaltma maddələri ilə ittiham olunub.
Yanvarın 28-də keçirilən hazırlıq iclasına Sevinc Musayeva qatılmayıb, növbəti iclas 7 fevrala təyin edilib.
Qeyd edək ki, S.Musayeva Miri Yusif tənqid və təhqirlərin yer aldığı ifadələr yazmışdı.
O, daha sonra “Youtube” kanalında video paylaşaraq daha uzun bir açıqlama vermişdi. Əldə etdiyimiz məlumata görə, S. Musayeva həmin görüntüləri kanalından silib.
Onu da bildirək ki, 147.1 maddə sübuta yetirilərsə, günahkar min manatdan min beş yüz manatadək miqdarda cərimə ilə və ya iki yüz qırx saatdan dörd yüz səksən saatadək müddətə ictimai işlər və ya bir ilədək müddətə islah işləri və ya altı ayadək müddətə azadlıqdan məhrum etmə ilə cəzalandırılır.
148-ci maddənin cəzası isə min manatdan min beş yüz manatadək miqdarda cərimə və ya iki yüz qırx saatdan dörd yüz səksən saatadək müddətə ictimai işlər və ya bir ilədək müddətə islah işləri və ya altı ayadək müddətə azadlıqdan məhrum etmədir.
