Məşhur bir mesajlaşma tətbiqi vasitəsilə ona yazan və özünü “Kerem Bürsin” kimi təqdim edən bir şəxslə əlaqə quran qadın fırıldaqçılıqla üzləşib.
OLAY yazır ki, İnternet üzərindən qurulan münasibət aylar boyu fasiləsiz davam edib. Qarşısındakı şəxsin göndərdiyi saxta foto və videolara tam inanan qadın tədricən qurulan bu tələ toruna düşüb.
Daha sonra, guya məşhur aktyor İstanbuldan Moskvaya içində çox qiymətli şəxsi əşyaların olduğu bir konteyner göndərəcəyini iddia edib. Gömrükdəki təhlükəsizlik yoxlamaları, daşınma xərcləri və müxtəlif miqrasiya prosedurları bəhanəsi ilə təcili maddi dəstəyə ehtiyacı olduğunu bildirərək qadından pul istəyib. Hətta “Konteyner çatdıqda içindən istədiyin əşyaları götürə bilərsən” deyərək onu inandırmağa çalışıb.
Sevdiyi aktyora kömək etmək istəyinə qapılan qadın heç düşünmədən dələduzun hesabına ümumilikdə təxminən 2 milyon rubl (təxminən 45 min manat) köçürüb.
Məbləğ göndərildikdən sonra saxta “Kerem Bürsin” birdən yoxa çıxıb və həqiqət üzə çıxıb. Özünün aldadıldığını anlayan zərərçəkmiş qadın dərhal şikayət edib.
