Samirə Ərəblinskaya (Müəllif)
Aktrisa Aybüke Pusat TRT-də yayımlanan “Teşkilat” serialından uzaqlaşdırılıb.
OLAY yazır ki, bu barədə TRT özü məlumat yayıb. Bildirilib ki, Aybükenin çıxarılmasına səbəb boykot kampaniyasına qoşulmasıdır:
“Türkiyənin ictimai yayımçısı TRT, keyfiyyətli yayımçılığı və məzmunları ilə ölkəmizdə və qlobal miqyasda böyük rəğbət qazanan bir Türkiyə markasıdır. TRT-nin nüfuzunu və marka gücünü qorumaq TRT rəhbərliyinin ən önəmli məsuliyyətlərindən biridir.
TRT ilə işləyən şirkətlər və şəxslər də ictimai yayım prinsiplərini bilirlər və bir TRT layihəsində yer alarkən bu prinsiplər çərçivəsində hərəkət etmə məsuliyyətini öz üzərlərinə götürürlər.
Millətimizi təmsil edən TRT-nin layihələrində yer alan şəxslərin, içində olduqları layihə davam etdiyi müddətdə, bir siyasi partiya tərəfindən başladıldığı açıq şəkildə bəlli olan (və bu səbəblə siyasi mahiyyəti ilə ön plana çıxan), ölkəmizin iqtisadiyyatını hədəf alan, siyasəti və cəmiyyəti formalaşdırmaq məqsədi daşıyan, xalqı qütbləşdirən siyasi kampaniyanın bir parçası olması əsla qəbul edilə bilməz.
Siyasi bir qrupun siyasi məqsədləri naminə başladığı boykot çağırışına alət olmaq, TRT-nin prinsiplərinə, ictimai yayım anlayışına və peşəkar prinsiplərinə açıq şəkildə ziddir.
Eyni zamanda, bir tərəfdən TRT layihələrində yer alıb, digər tərəfdən əsassız iddialarla TRT-ni də əhatə edən boykot çağırışını dəstəkləmək kimi ziddiyyətli və həddi aşan davranışa icazə verilməsi gözlənilə bilməz.
Bu çərçivədə, TRT 1-də yayımlanan “Teşkilat” serialında rol alan aktyorun paylaşımları TRT-nin institusional prinsipləri ilə əsla uyğun gəlmir. “Teşkilat” serialının izləyicilərini də məyus edən bu paylaşımlar səbəbilə həmin şəxs serialdan uzaqlaşdırılıb. Serialın stok bölümləri çəkilmiş olsa da, ssenarisində dəyişiklik ediləcəkdir. Oxşar hallarla bağlı da zəruri addımların atılacağından heç kimin şübhəsi olmasın”.
